Luiz Ejlli ka prekur ndjekësit e tij me një mesazh shumë emocional në vigjilje të Krishtlindjeve, duke ndarë ndjesitë më të thella të zemrës së tij në një nga netët më të veçanta të vitit.

Përmes një postimi reflektues, këngëtari rrëfen se data 24 dhjetor për të nuk është festë, por një natë e rëndë kujtimesh dhe emocionesh. Ai kujton me dhimbje mungesën e babait, duke theksuar se kanë kaluar pesë vite pa të, por boshllëku nuk është mbushur kurrë. Sipas Luizit, çdo Krishtlindje vjen me të njëjtën mungesë dhe të njëjtën dhimbje që nuk shuhet.

Në mesazhin e tij, Luizi ndalet edhe te jeta personale dhe dashuria me Kiarën, të cilën e përshkruan si një takim që erdhi në momentin më të thyer të jetës së tij. Ai shprehet se kjo dashuri u kthye në një shpëtim të heshtur dhe se fryti më i bukur i saj është vajza e tyre, Luna, të cilën e quan dritë dhe shpresë që mposht çdo dhimbje.

Gjithashtu, ai përmend edhe eksperiencën në Big Brother, formatin që, sipas tij, i ndryshoi rrjedhën e jetës. Luizi e përshkruan atë si një derë që i dha mundësinë të rritej, të provonte veten dhe të rindërtohej si njeri dhe artist.

“Sonte kam lot, dashni, kujtime dhe falënderim,” shkruan ai, duke sqaruar se nuk po feston, por po ndjen. Mesazhi i tij përmbyllet me një urim të ndjerë për Krishtlindje, për njerëzit që ka pranë dhe për ata që do të jetojnë gjithmonë në zemrën e tij.

Ky rrëfim i sinqertë dhe njerëzor i Luiz Ejllit ka marrë reagime të shumta pozitive nga fansat, të cilët e kanë vlerësuar për ndarjen e hapur të emocioneve dhe ndjenjave të tij më të thella.